Myndstef minnir á málþing um gervigreind og höfundarétt þann 29. september 2023. Sæti eru takmörkuð og því mikilvægt að skrá sig sem fyrst. Fulltrúar myndhöfunda og sjónlistafólks verða með fyrirlestra og í panel.
Hlynur Helgason, varaformaður SÍM, dósent í listfræði við Háskóla Íslands og myndlistarmaður verður með fyrirlestur um sjálfvirka myndvinnslu – verkan og álitamál, og Rósa Dögg Þorsteinsdóttir, lýsingahönnuður og formaður stjórnar MH&A og formaður Félags húsgagna- og innanhúsarkitekta, sem og Björg Ingadóttir, framkvæmdarstjóri Spaksmannsspjara, hönnuður og kennari við LHÍ, munu sitja í panel á málþinginu.
Miðasala er í gegnum tix.is. Miðaverði verður stillt mjög í hóf; aðeins 2.500 kr.
Gervigreind hefur verið í umræðunni um árabil og reglulega berast fregnir af framþróun og aukinni úbreiðslu hennar hvarvetna. Sér í lagi hefur listsköpun verið í kastljósinu undanfarið, eftir því sem tækni hefur fleygt fram og notkun gervigreindar aukist hröðum skrefum á hinum ýmsu sviðum skapandi greina.
Samhliða þessu hafa eðlilega vaknað áleitnar spurningar, einkum varðandi hagnýtingu og höfundarétt varnings og verka sem til verða með atfylgi eða milligöngu gervigreindar, ekki síst með hliðsjón af listaverkum sem notuð eru til „þjálfunar“ gervigreindar.
Þann 29. september n.k. verður haldið málþing um gervigreind og höfundarétt í Kaldalóni Hörpu. Verður þar boðið upp á fyrirlestra og hringborðsumræður með kunnáttufólki á sviðum tækni, fræða, lista og laga. Markmið málþingsins er ekki að tala niður eða hafna gervigreind, heldur að varpa fram spurningum og fræðast um möguleg framtíðaráhrif hennar á skapandi greinar.
Eftirfarandi samtök og stofnanir standa að málþinginu: STEF, Myndstef, Rithöfundasambandið, Hagþenkir, Blaðamannafélagið, Félag leikstjóra á Íslandi, Samtök kvikmyndaleikstjóra, Félag kvikmyndagerðarmanna, Félag leikskálda og handritshöfunda, SÍM (Samband íslenskra myndlistarmanna), Listaháskóli Íslands og Háskólinn á Bifröst.
Á meðan þingið stendur yfir verður boðið upp á kaffi, te, vatn og bakkelsi. Að þingi loknu verða léttar veitingar í boði.
Hér má sjá dagskrá þingsins.
