Á aðalfundi SÍM fyrr á þessu ári var Knútur Bruun, hæstaréttarlögmaður, frumkvöðull að stofnun Myndstefs og einn af brautryðjendunum í höfundarréttarmálum hér á landi gerður að heiðursfélaga SÍM. Knútur gat ekki verið viðstaddur aðalfund SÍM og því var boðað til móttöku þann 6. desember s.l. Var Knútur þá formlega heiðraður og veitt heiðursmerki SÍM.
Knútur Bruun átti hugmyndina að stofnun Myndstefs, hann annaðist stofnun þeirra árið 1991 og rak þau og mótaði í nærri 20 ár. Knútur var fyrsti formaður stjórnar Myndstefs fyrir hönd Félags íslenskra myndlistarmanna, en segja má að hvatinn af stofnun samtakanna hafi verið sú nauðsyn að bregðast við áralangri misnotkun á höfundarrétti sem viðgekkst. Frá því að Myndstef var stofnað hefur orðið mikil bragarbót á höfundarréttarmálum á Íslandi og er það ekki síst að þakka þrotlausri hagsmunagæslu Knúts Bruun fyrir hönd félagsmanna.
Þess má geta að á aðalfundi Myndstefs árið 2014 var Knútur einnig sæmdur heiðursfélaganafnbót fyrir áralöng störf sín í þágu íslenskra listamanna sem aðild eiga að sjóðnum.
Meðfylgjandi myndir voru teknar á móttökunni þann 6. desember (hægt er að sjá myndirnar stærri með því að smella á þær).
©Myndstef/GSV
©Myndstef/Ragnar Th
